Gipuzkoako Ganberak berretsi du AHTa Ezkio-Itsasotik Nafarroarekin lotzea dela aukerarik lehiakorrena
Gipuzkoako Ganberak ibilbide denborak erabakigarriak direla defendatzen du, eta Ezkio-Itsaso bidez Nafarroarekin trenbidea lotzearen abantailetako bat dela.
Donostia – 2025eko otsailaren 3a - Gipuzkoako Ganberak Ezkio-Itsaso bidez Nafarroarekin trenez lotzea aldarrikatu du, Gipuzkoako lurralde eta enpresa sarearentzat aukerarik lehiakorrena delakoan. Erakundeak, lurraldeko industria, merkataritza, nabigazio eta zerbitzuen interes orokorrak ordezkatuz, sustatuz eta defendatuz, uste du Abiadura Handiko Trenaren azpiegitura martxan jartzea estrategikoa dela Gipuzkoarentzat, eta, beraz, euskal Y-a Nafarroako lurrarekin Gipuzkoako lurzoruaren bidez lotzea defendatzen du, bere garaian proiektatu zen bezala.
Ildo horretan, Gipuzkoako Ganberak dio garraio ibilbideko denborak erabakigarriak direla, Jose Antonio Santano Espainiako Gobernuko Garraioen eta Mugikortasun Iraunkorraren Estatu idazkariak egindako azken adierazpenei erreferentzia eginez. Hain zuzen ere, Ezkio-Itsasoko lotuneak eskaintzen duen abantaila ugarietako bat dela azpimarratu nahi du Ganbarak.
Konexio horren bidez, Donostia eta Iruña arteko ibilbidea 44 minututan egingo litzateke, eta Vitoria-Gasteiz zeharkatuz gero, berriz, 69 minututan. Hau da, Ezkio-Itsasoko konexioak 25 minutu aurreztea ekarriko luke, eta hori funtsezkoa da AHT bezalako azpiegitura batentzat, pertsonen eta merkantzien desplazamendu-denborak laburtzea bilatzen baitu.
Gipuzkoako Ganberako presidente Mauricio Arreguiren hitzetan, “gure azpiegituren etorkizunerako une erabakigarrian gaude, eta kontuan hartuta beranduegi goazela eta ez dela onargarria Euskadin abiadura handirik gabe jarraitzea, aukeraketak egokiena izan behar du, gure lurraldearen etorkizunerako duen aukera handia baloratuz”. Ganberako presidenteak gogorarazi du azpiegitura hori ez izatea eta beste merkatu batzuekin lotuta egotea lehiakortasun faktore negatiboa dela, eta gure enpresen jarduerari ere eragiten diola.