Hitzarmen berriak 500.000 euroko ekarpena aurreikusten du lurraldeko enpresei nazioartekotzen laguntzeko.
Akordioak Gipuzkoa Prestatzen programa berria hartzen du barnean, nazioarteko potentziala duten ETEak kanpoko merkatuetara irekitzen prestatzekoa.
Bi erakundeek enpresen lehiakortasunarekiko konpromisoa indartu dute, ziurgabetasunak eta aldaketa geopolitikoek markatutako nazioarteko testuinguru batean.
2026ko azaroaren 10a.-Gipuzkoako Ganberak eta Gipuzkoako Foru Aldundiak, Ekonomia Sustapeneko eta Proiektu Estrategikoetako Departamentuaren bitartez, lankidetza hitzarmen berria sinatu dute Gipuzkoako enpresen nazioartekotzea bultzatzeko. Akordioak 500.000 euroko ekarpena aurreikusten du, merkatu berrietara errazago sartu, esportazio-oinarria handitu eta lurraldeko enpresa-sarearen lehiakortasuna indartzeko.
Ekonomia Sustapeneko eta Proiektu Estrategikoetako diputatu Unai Anduezak eta Gipuzkoako Ganberako presidente Mauricio Arreguik sinatutako hitzarmenaren bitartez, jarraipena ematen zaio bi erakundeen arteko lankidetzari, enpresei –bereziki ETEak– nazioartekotze prozesuetan laguntzeko.
Enpresa sarea nazioartekotzeko konpromiso instituzionala
Tentsio geopolitikoek, merkataritzako oztopoek eta hornidura kateen eraldaketak markatutako nazioarteko jokaleku baten erronkei erantzuten die hitzarmen berriak. Testuinguru horretan, bi erakundeek lehentasunezkotzat jotzen dute enpresei tresnak eskaintzea, aldaketetara egokitu eta negozio-aukera berriak aprobetxatu ahal izateko.
Unai Anduezak, Ekonomia Sustapeneko eta Proiektu Estrategikoetako diputatuak, enpresei egungo nazioarteko testuinguruan ematen zaien laguntza indartzearen garrantzia nabarmendu du: “Nazioartekotzea funtsezko tresna da gure enpresen lehiakortasuna indartzeko. Jokaleku global gero eta konplexuago eta zalantzagarriago honetan, ETE-ek eskura izan behar dituzte beren merkatuak dibertsifikatzeko, aukera berriak identifikatzeko eta nazioarteko merkataritzaren erronkei aurre egiteko behar dituzten laguntza eta baliabideak. Bereziki garrantzitsua da hori”.
Era berean, Anduezak azpimarratu du garrantzitsua dela laguntza tresnak enpresa sarearen beharretara egokitzea: “Gipuzkoako enpresa gehiago kanporako jauzia egitera anima daitezela nahi dugu, eta dagoeneko nazioartean dauden enpresek presentzia hori sendotu ahal izatea. Hitzarmen honekin, prozesu horren etapa bakoitzean –hasierako prestalanetatik, merkatu berrietan finkatu arte– laguntzeko konpromisoa indartzen dugu, ekonomia sendoagoa, irekiagoa eta erresilienteagoa eraikitzen laguntzeko”.
Gipuzkoako Ganberaren aldetik, Mauricio Arregui, erakundeko presidenteak, enpresei beren nazioartekotze-prozesuetan ematen zaien laguntza hurbil eta espezializatuaren balioa nabarmendu du: "Nazioartekotzeak ezagutza, plangintza eta laguntza eskatzen ditu. Gipuzkoako Ganberatik oso argi daukagu gure zeregina enpresetatik gertu egotea dela, haien beharrak ezagutzea eta hazteko aukera onenak eskain diezazkieketen merkatuak identifikatzen laguntzea.
Etengabe lan egiten dugu nazioarteko merkatuen bilakaera aztertzeko, aukera berriak detektatzeko eta ezagutza hori lurraldeko enpresen zerbitzura jartzeko. Hitzarmen honek aukera ematen digu elkarlan hori indartzen jarraitzeko eta gure enpresei nazioarteko ingurunean hazteko eta lehiatzeko behar dituzten laguntza eta tresnak eskaintzen jarraitzeko ".
Gipuzkoa Prestatzen, ETEak nazioartera irekitzea sustatzeko programa berria
Hitzarmenaren berrikuntza nagusietako bat da Gipuzkoa Prestatzen programa jartzen duela abian, nazioarteko potentziala duten eta kanpoko merkatuetan sartzeko prestatu behar duten Gipuzkoako ETE-entzat.
Ekimenak nazioartekotzearen lehen faseetan lagundu nahi die enpresa horiei, eta prozesuari modu ordenatuan eta progresiboki ekiten lagundu, haien gaitasunen eta premien arabera.
Programa berriak lurraldeko enpresentzat eskuragarri dauden laguntza tresnak handitzen ditu, eta merkatu berrietara irekitzen prestatu ahal izateko bultzada ematen die oraindik nazioartekotu gabe daudenei.
Enpresen beharrei erantzuteko jarduera plana
Ekimen berri horretaz gain, hitzarmenak hainbat programa jasotzen ditu enpresei nazioartekotzen laguntzeko.
Horien artean daude misio enpresarialak, enpresak intereseko merkatuetara hurbiltzea errazteko, eta Gipuzkoa Zabaltzen, esportazio jarduera mugatua edo merkatu gutxitan kontzentratua duten ETE-entzat, haien dibertsifikazioa bultzatzeko eta Europar Batasunetik kanpoko herrialdeetarako esportazioak sustatzeko.
Bestalde, OTEB programak nazioarteko jarduera garatzen laguntzen die oinarri teknologikoko enpresa berriei; LagundEX Operativok, berriz, auditoretzak eta aholkularitza espezializatua eskaintzen ditu, kanpo merkataritzarekin lotutako prozesuak hobetzeko.
Akordioan Market eSupport ere sartzen da, enpresa industrial esportatzaileen ikusgaitasun eta presentzia digitala indartzeko programa, bereziki, industria azpikontratistei dagokienez.
Era berean, Argibide zerbitzua mantentzen da, zeinak informazio eta aholkularitza espezializatua ematen duen, nazioarteko merkataritzari buruzko kontsultak erantzun eta enpresei kanpo eragiketetan laguntzeko.
Jarduera horiekin guztiekin, Gipuzkoako Ganberak eta Foru Aldundiak lankidetza sendotu dute, Gipuzkoako enpresen nazioarteko presentzia indartu eta enpresa sare lehiakorrago bat garatzen laguntzeko, ekonomia globalaren erronkei aurre egiteko prestatuago egongo dena.
Gipuzkoako Ganberak misio enpresarial estrategikoa antolatuko du, Kanadara, 2027ko martxoan
Hitzarmenean jasotako jarduerak alde batera utzita, eta aurreko urteetan garatutako ekimenei jarraipena ematen, Gipuzkoako Ganberak misio enpresarial estrategikoa antolatuko du, Kanadara, 2027ko martxoan. Helburua da Gipuzkoako enpresak Kanadako merkatuaren negozio-aukera berrietara hurbiltzea.
Ekimen horri esker, lehen eskutik ezagutu ahal izango da herrialde horretako enpresen ingurunea, lankidetza bide posibleak identifikatu ahal izango dira, eta lurraldeko enpresen nazioarteko presentzia handitzen lagunduko duten merkataritza-harremanak ezartzen lagunduko da.
Misio berri horrekin, intereseko merkatuetara zuzenean hurbiltzearen aldeko apustua egiten jarraitzen du Gipuzkoako Ganberak, enpresen arteko harremanak bultzatzeko eta hazkunde aukera berriak sortzeko tresna den aldetik.
