Ehun bat enpresa mugaz gaindiko lankidetzarako aukera berriak aztertzen ari dira biztanleriaren zahartzearen aurrean
Donostia, 2024ko azaroaren 12a.-Gipuzkoako Ganberak lan-jardunaldi bat ospatu du gaur goizean. Bertan, mugaren bi aldeetako enpresa eta erakundeek lankidetza-bide berriak aztertu dituzte, "Silver Economy" delakoarekin lotutako proiektuen inguruan. Topaketa Bihartean-en baitan antolatu da, Baionako Ganberaren eta Nafarroako Ganberaren partaidetzarekin eta Euroeskualdearen lankidetzarekin batera.
"Silver Economy" deritzona 55 urtetik gorako biztanleen beharrak asetzeko produktu eta zerbitzuen jarduera ekonomiko guztiak biltzen dituen sektorea da. Ildo horretan, jardunaldian azpimarratu da Europak aurrekaririk gabeko aldaketa demografiko bati aurre egin behar diola; izan ere, 2050erako, Europako biztanleriaren % 30 baino gehiagok 65 urte baino gehiago izango dituela aurreikusten da. "Egoera honek aukera paregabea ematen du adinekoen bizi-kalitatea hobetuko duten soluzio eta zerbitzu berriak garatzeko, eta, aldi berean, motor ekonomiko garrantzitsua sortzen du", adierazi du Mikel Anton Eusko Jaurlaritzako Europako Gaietarako zuzendariak irekiera-hitzaldian.
Nafarroan, Nouvelle Aquitainen eta Euskadin Silver Economy eta osasunaren sektoreetan lan egiten duten balio-kate osoko (publikoak zein pribatuak) ehun enpresa ordezkari inguru izan dira ekitaldian. Arrakasta-kasuei eta martxan dauden proiektuei buruzko ponentzien bidez, jardunaldiak aukera eman du ideiak trukatzeko, sinergiak sortzeko eta berrikuntza eta adinekoei eta osasunarekin lotutako sektoreari lotutako ekonomia bultzatuko duten lankidetza-proiektuak garatzeko. Azkenik, ekitaldian parte hartu duten erakundeek beren ideiak partekatzeko aukera izan dute gaikako lau tailerretan.
Hiru eskualdeetatik lantzen ari diren estrategia instituzionalak azaldu dira, hala nola Gipuzkoako Adinberri proiektua, datozen hiru urteetarako bere ikuspegi estrategikoarekin, Nafarroako Osasun Zerbitzuak bere erosketa-sistema publikoarekin planteatutako lan-ildoak, edo Nouvelle-Aquitaineko Gerontopole eredu bakarra. "Gizarte, osasun edo enpresa arloetan zeharkako begirada duen ekimena izatea da konplexuena", gaineratu zuen Rakel San Sebastián Adinberriko zuzendariak.
Proiektu berritzaileak
Gaur aurkeztutako proiektuen artean, Telelaguntza Prediktiboa proiektua dago. Adinberrik hainbat enpresarekin (Accexible eta Ayesa, besteak beste) sustatu du, eta adimen artifiziala erabiltzen du Eusko Jaurlaritzaren BetiON zerbitzuaren erabiltzaileen beharrei aurrea hartzeko eta iragarpenean eta prebentzioan oinarritutako eredu pertsonalizatua eskaintzeko.
Gaur ezagutzera eman den beste proiektuetako bat VitalCare Nurse izenekoa da, SB-Tech Europe enpresak garatua. Ohean instalatutako gailuak dira, kamera adimendunen laguntzarekin zenbait datu ematen dituztenak. Datu horiek aztertu eta tratatu ondoren, loaldiko anomaliak, bihotz-biriken maiztasuna edo erorikoez ohartarazteko aukera ematen dute.
Asier Barandiaran Gipuzkoako Ganberako teknikariaren hitzetan, "senior biztanleen ongizaterako zerbitzu eta produktuen eskaria gero eta handiagoa den testuinguru honetan, mota honetako topaketa sektorialak aukera bikaina dira mugaren bi aldeetako enpresek elkarrekin konektatzeko, harremanak ezartzeko eta mugaz gaindiko lankidetzarako aukera berriak sortzeko."
Nuevo encuentro de Bihartean
Silver Economyri buruz gaur Gipuzkoan egin den mugaz gaindiko topaketa aurten Biharteanek Euroeskualdearekin sinatuta duen Hitzarmenaren esparruan antolatu den hirugarrena da. Aurreko beste bi egin dira, ekainean Iruñean, turismoaren inguruan, eta urrian Baionan, nekazaritzako elikagaien sektorearen etorkizunari buruz.
Topaketa horiez gain, Biharteanek, Gipuzkoako Ganberako, Nafarroako Ganberako eta CCI Bayonne – Pays Basqueko langileen bitartez, 45 aholkularitza eman dizkie aurten mugaren bi aldeetako enpresei, hurbileko nazioartekotze-proiektuak garatzeko.
Duela 14 urte eratu zen Bihartean, eta interes ekonomikoko talde europarra da. Bere helburua da Gipuzkoako, Nafarroako eta Baionako Ganberen arteko koordinazioa hobetzea, eta mugaz gaindiko ingurunean ordezkaritza handiagoa bilatzea, eskualde-integrazio handiagoa lortzeko eta Europar Batasunaren eremuan eskualde-lankidetzako proiektuak finantzatzeko egitura berria baliatzeko. Zentzu horretan, bere jarduera lurralde osoko enpresen arteko lankidetza bultzatu eta sustatzea du helburu, gaur goizean Gipuzkoako hiriburuan garatutakoa bezalako ekimenen bidez.