Gipuzkoako Ganberak eta LABORAL Kutxak elkarlana indartu dute Gipuzkoako enpresen ekintzailetza eta nazioartekotzea sustatzeko
Donostia, 2026ko uztailaren 16a. Gipuzkoako Ganberak eta LABORAL Kutxak beren arteko lankidetza berritu dute, azken urteotan Gipuzkoako enpresa-sarea indartzeko elkarrekin garatzen ari diren lana sendotzen duten bi hitzarmen sinatuz. Hitzarmen horiei esker, ekintzailetzari ematen zaion babesa indartuko da, negozioen jarraipena erraztuko da eta lurraldeko enpresen nazioartekotzea bultzatzen jarraituko da.
Bi erakundeek helburu bera partekatzen dute: Gipuzkoaren garapen ekonomikoari laguntzea, enpresen lehiakortasuna hobetuko duten eta enpresen sorrera, sendotzea eta hazkundea erraztuko dituzten ekimenen bidez. Ildo horretan, sinatutako hitzarmenek hainbat lankidetza-ildo ezartzen dituzte, aholkularitza, baliozko informazioaren zabalkundea eta enpresen zein ekintzaileen beharretara egokitutako finantza-irtenbideak uztartuz.
Lankidetza honen ardatz nagusietako bat ekintzailetzaren sustapena da. Hitzarmen honen bidez, LABORAL Kutxak baldintza bereziak eskainiko dizkie Gipuzkoako Ganberaren zerbitzuetara jotzen duten ekintzaileei, bai eguneroko jardunerako finantza-produktuetan, bai enpresa-proiektu berriak finantzatzeko irtenbideetan. Bestalde, Gipuzkoako Ganberak abantaila horien berri emango die artatzen dituen ekintzaileei, eta informazio hori eskuratzeko bidea erraztuko du, enpresak sortzeko laguntza-zerbitzuaren barruan.
Era berean, bi erakundeek Gaztenpresa eta Berriz Enpresa programen arteko lankidetza indartuko dute, enpresen jarraipena eta belaunaldi-erreleboa sustatzeko helburuarekin. Elkarlan horri esker, lehendik dauden negozioak erosteko edo eskualdatzeko aukerak hurbilduko zaizkie ekintzaileei, eta, aldi berean, beren jarduera eskualdatu nahi duten enpresaburuek beren enpresei jarraipena emango dieten ekintzailetza-proiektu berriak aurkitzeko aukera izango dute.
Bigarren hitzarmenaren helburua Gipuzkoako enpresen nazioartekotzeari babesa ematen jarraitzea da. Horretarako, Gipuzkoako Ganberak gaurkotasuneko informazio espezializatua prestatuko du, nazioarteko merkatuei, negozio-aukerei, laguntzei, deialdiei, merkataritza-misioei eta nazioarteko jarduera duten enpresentzat interesgarriak diren bestelako edukiei buruzko informazioa eskainiz.
Ekimen horiez gain, bi erakundeek hitzarmenen berri emateko konpromisoa hartu dute, bakoitzaren komunikazio-kanalen bidez, eta, era berean, Gipuzkoako enpresa-ekosistema indartzen lagunduko duten lankidetza-bide berriak aztertzen jarraituko dute.
Hitzarmen hauek sinatuta, Gipuzkoako Ganberak eta LABORAL Kutxak berriro ere berretsi dute lurraldeko enpresekiko duten konpromisoa, lankidetza egonkor baten alde eginez. Lankidetza horren bidez, enpresa-proiektu berriak sustatu, negozioen jarraipena erraztu eta Gipuzkoako enpresei hazkunde-prozesuan eta nazioarteko merkatuetara zabaltzeko bidean laguntzen jarraituko dute.